Skip to main content

Áherslur ÖBÍ réttindasamtaka

Bætt kjör

Hækka þarf lífeyri ríflega, draga verulega úr tekjuskerðingum og hækka skattleysismörk svo fatlað fólk þurfi ekki að búa áfram við fátækt. » Kjaramál

Aðgengilegur vinnumarkaður

Fjölga þarf hlutastörfum til að tryggja raunverulega möguleika fatlaðs fólks til atvinnuþátttöku. Stofna þarf vinnuaðlögunarsjóð svo fyrirtæki geti gert vinnustaði aðgengilega. » Upplýsingagátt fyrir stofnanir og fyrirtæki

Öruggt húsnæði

Bregðast þarf við húsnæðisvanda fatlaðs fólks, sem býr við íþyngjandi húsnæðiskostnað. Tryggja þarf að húsnæðiskerfi innihaldi lausnir sem virka fyrir fatlað fólk. Eyða þarf biðlistum og bjóða fötluðu fólki búsetu og þjónustu við hæfi í stað þess að vista það á hjúkrunarheimilum. » Húsnæðismál

Jöfn réttindi fatlaðs fólks óháð uppruna

Fatlað fólk af erlendum uppruna á Íslandi hefur sömu þörf og aðrir fyrir stuðning og tryggja þarf jöfn réttindi óháð uppruna. Mjög mikilvægt er að fötluðu fólki af erlendum uppruna sé auðveldað að nálgast upplýsingar um réttindi sín. » Innflytjendur og flóttafólk

Stafrænar lausnir

Brýn þörf er á að setja löggjöf og staðla um stafrænt aðgengi, opinber vefsvæði og smáforrit rétt eins og önnur evrópsk ríki hafa gert. Stafræn þróun verður að taka mið af þörfum fatlaðs fólks. Öll skulu hafa jafnan rétt að stafrænum upplýsingum og lausnum. » Stafrænt aðgengi

Heilbrigðisþjónusta fyrir öll

Tryggja þarf aðgengi fatlaðs fólks að heilbrigðisþjónustu, þar á meðal sálfræði- og tannlæknaþjónustu. Kostnaður er nú íþyngjandi og biðin of löng. Vinna þarf með markvissum hætti að því að eyða biðlistum í heilbrigðiskerfinu. Ný ríkisstjórn verður sérstaklega að tryggja að börn séu ekki á biðlista. » Heilbrigðismál

Réttindi barna

Tryggja verður að allt starfsfólk skóla búi yfir færni til að taka á móti fjölbreyttum nemendahópi. Sömuleiðis þarf að tryggja öllum börnum jafna möguleika til að taka þátt í tómstunda-, íþrótta og frístundastarfi. » Málefni barna

Aðgengilegar almenningssamgöngur

Tryggja þarf að almenningssamgöngur séu aðgengilegar, eins og lög gera ráð fyrir. Það nær bæði til farartækja sem og biðstöðva. Bráð þörf er á að flugrútan verði gerð aðgengileg hreyfihömluðu fólki.

Viðeigandi hjálpartæki

Nauðsynlegt er að endurskoða núgildandi hjálpartækjastefnu. Öll þurfa að hafa aðgengi að viðeigandi hjálpartækjum.

Algild hönnun

Tryggja þarf að ákvæðum byggingareglugerðar um algilda hönnun verði framfylgt, enda nýtist það öllu samfélaginu. » Aðgengi

Texiti með mynd af ungum manni: Að eiga ekki fyrir óvæntum útgjöldum, kryddar upp á tilveruna. Jón Sætran

Til  nýrra alþingismanna 2024

ÖBÍ réttindasamtök fengu Vörðu, rannsóknastofnun vinnumarkaðarins, til þess að vinna rannsókn á stöðu fatlaðs fólks á Íslandi haustið 2023.

Niðurstöðurnar sýna að stór hluti fatlaðs fólks á Íslandi býr við sárafátækt og lífsskilyrði lífeyristaka eru töluvert verri en launafólks. Staða einhleypra foreldra er sérstaklega alvarleg.

Skýrslan: Staða fatlaðs fólks á Íslandi

”

„Okkar minnstu bræður og systur“ og  „þau sem minna mega sín“

Þetta orðalag er hluti af meðaumkunaröráreitni og gerir lítið úr fötluðu fólki. Orðalagið vísar til þess að veik staða fatlaðs fólks í samfélaginu orsakist af andlegu eða líkamlegu atgervi þessa hóps. Vissulega er fatlað fólk oft í veikri stöðu í samfélaginu en það er ekki vegna áskapaðra þátta, heldur jaðarsetningar samfélagsins. Lesa meira

Flóttafólk / öryrkjar!

Af og til heyrast þær raddir, einnig meðal stjórnmálafólks, að við sem þjóð eigum fyrst að bæta aðstæður okkar fólks áður en við hjálpum öðrum og eru bág kjör öryrkja gjarnan nefnd í því samhengi. Þarna er verið að stilla upp tveimur hópum sem þurfa á aðstoð að halda – gegn hvor öðrum.

Ýjað er að því að þeir fjármunir sem fara í móttöku flóttafólks séu ástæðan fyrir fátækt meðal öryrkja. Ef sú væri raunin, þá hefðu öryrkjar búið við mun betri lífskjör áður en móttaka flóttamanna hófst en því fer víðs fjarri. Ekkert orsakasamband er þarna á milli.

”Íslenska ríkið getur gert hvort tveggja, tekið á móti stríðshrjáðu fólki á flótta og bætt kjör öryrkja ef pólitískur vilji væri fyrir hendi.

Fatlað fólk kærir sig ekki um að mannréttindabrot gagnvart þeim sé notað sem afsökun fyrir þau sem eru andvíg móttöku flóttafólks.

”Ekkert um okkur án okkar

Nauðsynlegt er að stjórnvöld virði samráðsskyldu sína við fatlað fólk strax frá upphafi mála.