Út er komin skýrsla ÖBÍ réttindasamtaka um húsnæðismál fatlaðs fólks, þar sem farið er yfir víðan völl um stöðu fatlaðs fólks á íslenskum húsnæðismarkaði. Lesa má skýrsluna í heild með því að smella á hlekkinn hér að neðan.
Meðal annars er vitnað í niðurstöður rannsóknar sem gerð var á húsnæðismálum fólks með 75% örorkumat sem leiddu í ljós að miklum mun fleiri öryrkjar eru á leigumarkaði en aðrir fullorðnir. Mun færri öryrkjar eiga fasteign og þeir öryrkjar sem eiga fasteign eignuðust hana almennt áður en þeir urðu öryrkjar.
ÖBÍ réttindasamtök leggja áherslu á fjögur atriði til að bæta aðgengi fatlaðs fólks að húsnæðismarkaði í skýrslunni. Þetta eru fjölgun húsnæðisúrræða, þjónusta óháð búsetu, að fá þjónustuna heim (sbr. NPA) og að veittir séu styrkir til breytinga á húsnæði svo það gagnist fötluðu fólki.
