Lífsgæðasetur St. Jó er sjálfbær eining rekin af Hafnarfjarðarbæ og hefur húsnæðið að Suðurgötu 41, sem áður hýsti St. Jósefsspítala, verið í eigu sveitarfélagsins frá 2017. Síðan þá hefur mikill metnaður verið lagður í að byggja upp opið samfélag og eftirsóknarverðan vettvang fyrir hverskyns heilsueflingu. Þetta fallega hús hefur þannig fengið nýtt og mikilvægt hlutverk í að skapa Hafnarfirði sérstöðu sem heilsueflandi samfélags.
Alzheimersamtökin munu opna stuðningsmiðstöð til að veita þjónustu þeim sem greinast með heilabilun, 65 ára og yngri og aðstandendum þeirra. Parkinsonsamtökin munu opna parkinsonsetur til að aðstoða fólk með parkinsonveiki og aðstandendur þeirra, að takast á við þær áskoranir sem sjúkdómnum fylgja með sérhæfðri endurhæfingu og raddþjálfun. Stuðningur Oddfellow felst í því að aðstoða þessi samtök við að endurinnrétta alla 3ju hæð byggingarinnar, alls 530 fermetra.
Á 2. hæð er í dag rekið Lífsgæðasetrið sem býður upp á forvarnir, heilsuvernd, snemmtæka íhlutun, fræðslu og ljóst að samlegðaráhrifin verða mikil með komu samtakanna í bygginguna.
„Það hefur lengi verið draumur Alzheimersamtakanna að koma á fót þjónustumiðstöð fyrir þá sem greinst hafa með heilabilun og með styrk Oddfellow reglunnar verður sá draumur að veruleika. Tilkoma miðstöðvarinnar verður bylting í þjónustu við einstaklinga með heilabilun og aðstandendur þeirra,“ segir Vilborg Gunnarsdóttir framkvæmdastjóri Alzheimersamtakanna.
„Það eru stór tímamót í sögu Parkinsonsamtaknna að geta innan skamms tíma boðið betri aðstöðu fyrir ráðgjöf, stuðning, þjálfun og dagdvöl með sérhæfðri endurhæfingu fyrir fólk með parkinson. Stuðningurinn frá Oddfellow er ómetanlegur og breytir allri starfsemi samtakanna“ segir Vilborg Jónsdóttir, formaður Parkinsonsamtakanna.
Styrktar- og líknarsjóður Oddfellowa er sameiginlegur sjóður sem hefur veitt myndarleg framlög til líknarmála og á heimasíðu Oddfellow reglunar má sjá að síðustu 12 mánuði hefur Oddfellow regland styrkt ýmis málefnu um 148 milljónir króna. Steindór Gunnlaugson formaður Styrkar- og líknarsjóðs Oddfellow:
„Það eru forréttindi að fá að taka þátt í uppbyggingu sem þessari. Við höfum kynnt okkur starfsemi Alzheimer- og Parkinsonsamtakanna undanfarið ár og okkur finnst gríðarlega mikilvægt að hægt sé að reka þessa mikilvægu þjónustu fyrir veika einstaklinga og aðstandendur þeirra og að samtökin tvö fái að sanna sig til frambúðar í þessu glæsilega húsi sem Hafnarfjarðarbær hefur glætt nýju lífi. Fyrir okkur Oddfellowa er verkefnið afar gefandi og við erum virkilega stolt af því að tilheyra félagsskap sem getur komið að verkefnum með jafn öflugum hætti núna, ekkert síður en með fyrri verkum s.s. uppbyggingu líknardeildarinnar í Kópavogi, við uppbyggingu Samhjálpar í Hlaðgerðarkoti og með stækkun Ljóssins, endurhæfingarmiðstöðvar við Langholtsveginn“
„Sú ánægjulega niðurstaða að bæði Alzheimer- og Parkinsonsamtökin munu þróa starfsemi sína á Lífsgæðasetrinu á næstu árum er ótrúlega jákvætt og mikilvægt skref bæði fyrir Lífsgæðasetur St. Jó en ekki síður fyrir Hafnarfjörð sem heilsueflandi samfélag. Með þessu skrefi er Lífsgæðasetrið komið með öflugar kjölfestur í daglega starfsemi sína sem er frábær viðbót við þá fjölbreyttu þjónustu sem þegar er til staðar í húsinu“ segir Rósa Guðbjartsdóttir bæjarstjóri Hafnarfjarðar.
Áætlað er að framkvæmdum ljúki í ágúst 2021.
