ÖBÍ réttindasamtök og Landssamtökin Þroskahjálp sendu félagsmálaráðherra og dómsmálaráðherra bréf fyrir helgi vegna fyrirhugaðrar brottvísunar Yazans M. K. Aburajabtamimi, ellefu ára gamals drengs með Duchenne vöðvarýrnunarsjúkdóminn.
Í bréfinu lýsti ÖBÍ skýrri andstöðu við brottvísunina og byggir sú afstaða meðal annars á þekkingu á einkennum sjúkdómsins og hve alvarlegur hann getur reynst börnum. Sömuleiðis á skýru mati lækna á þeirri hættu sem getur falist í flutningi Yazans úr landi og þörf fyrir sérhæfða aðstoð sem óljóst er hvort hann fái á Spáni.
Fyrirhuguð brottvísun fer gegn ákvæðum samnings Sameinuðu þjóðanna um réttindi fatlaðs fólks og voru ráðherrar minntir á það í bréfinu að stjórnvöldum beri rík skylda til að tryggja réttindi fatlaðs fólks.
ÖBÍ réttindasamtök og Þroskahjálp skora á ráðherra að láta málið sig varða og stuðla að því að fallið verði frá flutningi Yazans úr landi eða þá tryggja með fullnægjandi hætti öryggi hans eftir öðrum leiðum.
